Rostocks ordinans for den tyske kjøpmann i Viken, særlig i Oslo, 31. Oktober 1472
Oslos historie © kane.benkestokk.teiste forlag (Tore Hermundsson Vigerust), Oslo 2000-2003. Utgave 22.11 2003. Etter orginal på pergament i Archiv der Hansestadt Rostock (tidligere Ratsarchiv zu Rostock). Trykt i Karl Koppmann: Zwei Ordnungen des Rats zu Rostock für seine Kaufleute in Oslo und Tönsberg, Hansische Geschichtsblätter (utg. av Verein für Hansische Geschichte), XVII, Jahrgang 1888 (Leipzig, 1890), s. 163-167; Norges gamle Love 2 r II nr. 424, s. 703-705. Utgaven nedenfor etter Koppmann 1888.

Wy borghermeystere unde radmanne to Rozstok bekennen unde betughen openbare vor allen unde islyken, de dessen breff seen edder horen lesen, dat wy umme wolfart des ghemen[en] besten unde nutticheyt willen unses kopmans, de in der Wyk, also Anslo, in Norweghen beleghen, ere handelynghe, kopenschop unde vorkerynghe nu hebben unde in tokomenden tiiden hebbende werden, ghesettet, schicket unde maket hebben desse nascreven stucke unde articule, de wy strenghelken wyllen gheholden hebben in formen, so nascreven steyt, van den copmannen vorberoret.

1. Int erste wannere de vaghet to Anslo vorbenomed heft bescriven laten des kopmanss ghudere unde esschet van den bescrevenen ghuderen enen benomeden summen in den konyngheskop, besunderghen van dessen sösleye ghuderen, alss bere, mele, hoppen, grawe laken, schone laken unde ungheblekeden lowande, dat denne de kopmanne samentliken scholen to hope ghan uppe des copmans staven, dar denne eyn jewelk kopman sine ghudere rechtferdyghen schal scriven laten, benomelken to der tiit de sosleye vorberoret, alse he dar int lant ghesant, gheforet, foren lathen heft unde inghekomen sin, alse he dat myt synen swaren eden beholden wyl.
2. Item also de olden rullen vorlecht sin, dat me sodane rullen schal wedder upsoken ofte nye rullen maken, dar de kopman sin ghud unde gheld na rekenen unde werdighen mach allerleye, kleen unde grot, also dat van oldynghes ghewesen is, unde de kopman alduss alle sine ghudere, clen unde grot, bescryven lathe, de he vorschaten unde vorleydinghen schal, alss he dat myt sinen swaren eeden beholden wyl unde dat eyn jewelyk schaden dreghe na macht unde werde synes ghudes.
3. Item dat nemant deme anderen syne kopnaten enthee ofte entbrynghe ofte dorch eynen anderen entbrynghe lathe unde nemant myt den kope, de by eneme anderen kopmanne to huss licht, ofte eynen anderen dar tho schicke de myt kost, borgher edder jemand anders, unde ok dat nemant deme anderen vorekop do myt vorsate.
4. Item ofte de kopmanne van jemende der erscreven koplude ere eede unde recht, so vorscreven is, to donde begherende ofte esschende wurden unde de jenne nene eede ofte recht don ofte syk nycht rychtighen laten wolde, dat vorwaren unde beholden wy borghermestere unde radmanne uns unvorsumet an sodanen unhorsamen to rychtende unde ene rychtich to makende, wannere wy dat van den olderluden ofte kopmannen irvaren na leghenheyt unde ghebore der saken.

In tuchnysse der warheyt desses vorscreven is unser stad secrete wytliken henget an dessen breff, Gheven unde screven to Rozstok na der bort Christi dusent veerhundert imme tweundesoventighesten jare amme sunnavende vor aller Godes hillighen daghe.