Rostocks ordinans for den tyske kjøpmann i Oslo og Tønsberg, 1. November 1452
Oslos historie © kane.benkestokk.teiste forlag (Tore Hermundsson Vigerust), Oslo 2000-2003. Utgave 22.11 2003. Etter original på papir i Archiv der Hansestadt Rostock. Tidligere trykt i Rostocker wöchentliche Nachrichten und Anzeigen 1756, s. 58 (med flere feil) [Wöchentliche Rostockische Nachrichten und Anzeigen]; Diplomatarium Norvegicum VII nr. 447, der det opplyses at utgaven er etter originalen i Rostocks Stadt-Archiv Nr. 5371, og at den har et påtrykt segl; Norges gamle Love 2 r II nr. 403, s. 653-654. Karl Koppmann: Zwei Ordnungen des Rats zu Rostock für seine Kaufleute in Oslo und Tönsberg, Hansische Geschichtsblätter (utg. av Verein für Hansische Geschichte), XVII, Jahrgang 1888 (Leipzig, 1890), s. 163-167, etter original på papir i Ratsarchiv zu Rostock, abt. Hanse, med spor av det påtrykte seglet; Hansisches Urkundenbuch VIII nr. 199. Utgaven nedenfor etter Koppmann 1888.

Wy borgermestere unde radmanne der stad Rozstok bekennen unde betugen vor alsweme unde sunderghen witlik donde deme copmanne, de to Anslo unde Tunsberge licht under der stede rechticheit, dat wi vulbort unde belevet hebben desse naschreven pûnte unde eyndracht.

• 1. Int erste dat eyn juwelk schal horen, wes em de olderlude beden na utwisinge der ordinancien.

• 2. Item dat sik eyn juwelke ware vor unwonlik vorboden kopenscop, de benomet unde beschreven is in der ordenancien.

• 3. Item dat nemandes den buluden to na en ga, dat dare nen clage over en kome. Were dat hir we enboven dede, dat schal de copman richten, yffte men schal se uns to kennen geven, so wil wi dat so mit enem richten, dat sik de anderen dar bi bekennen scholen.

• 4. Item yffte jemandes were, dede breve hadde, van weme he de hadde, dar he sik vordels aff vormodede, de des copmans ordenancien to vorfange weren, de schal he overgeven. Wolde he dar jegen wesen, so schal he nicht werdich wesen bi dem copman so sittende.

• 5. Item is vorboden hemelken seroveren odder stratenroveren menscop odder jenigherleye handelinge to hebbende mit dem copmanne.

• 6. Item were dar jemand, de sik vorbroken hadde jegen den copman mit worden yfft mit werken, den schal de copman nicht to gnaden nemen, sunder he hebbe deme copmanne dar lik unde sone vor gedan sunder gnade, alse de ordenancie utwiset.

• 7. Item weret, dat jemand were unredelken scheden van dem copmanne, deme schal men tospreken umme sinen broke, alse de ordenancie utwiset.

• 8. Item yfft jemandes were, dede jenige upsate makede jegen den copman edder des copmans hemelke achte unde dinge ut erer morgensprake sprengede, de schal men uns to kennen geven.
• 9. Eyn juwelk man se, dat he sik in eren vorware, dat wi nen recht mit em en krigen boven desse punte, articule unde ordenancie, de wi willen geholden hebben; queme hir clage over, dat dit jenich man breke, de under des copmans rechticheit is unde sik nicht wolde nogen laten an deme, dat de copman affsecht vor likenissse, den schal de copman uns beschreven geven; den wil wi richten mit Lubeschem recht.

Alle dessse vorscreven stucke, punte, eyndracht unde des copmans ordenancie vaste unde unbrekelken to holdende, hebbe wi to mer loven unde vestinge unser stad, secret drucken laten beneden an desse open schrifft. Geven unde schreven vor aller Godes hillighen dage anno Domini 1452 jar.

.